Errepidean ezustekorik ote dagoen eta aparkatzeko lekurik aurkituko ote dugun adierazi eta txirrindulariei arrisku-egoerak jakinaraziko dizkieten aplikazioak; horiexek dira Bilbon C-Mobile proiektuaren barruan probatuko diren zerbitzuetako batzuk. Hiri-mugikortasun seguruagoa eta eraginkorragoa lortzen lagun dezaketen garraio-sistema adimendun kooperatiboak (C-ITS) garatzea da proiektuaren helburua.

C-Mobile Europa osoko 36 bazkide dituen proiektua da, hala nola zentro teknologikoak, udalak, unibertsitateak eta enpresak. Ekimenari jarraikiz, zortzi pilotu inplementatuko dira Europako hainbat hiri eta eskualdetan, mugikortasun adimenduneko hainbat zerbitzu testatzeko. Bilborekin batera, Bartzelona, Vigo, Bordele, Kopenhage, Newcastle eta Tesalonika hiriek eta Ipar Brabante eskualdeak parte hartuko dute.

Bilboren kasuan, proiektua Basque Research & Technology Alliance partzuergoari atxikitako CEIT ikerketa zentroak koordinatu du. Pilotu honetan, ibilgailuak eta bide-azpiegiturak konektatuko dituzten bost zerbitzu kooperatibo instalatuko dira. Aplikazio hauek hiri-eremuan dauden aparkatzeko leku hutsei buruzko informazio baliagarria helaraziko diete gidariei, baita obrei buruzko oharrak eta pilaketa, istripu zein bestelako arrisku-egoerei buruzko jakinarazpenak ere. Horrekin batera, autobusen gune itsuan kokatzen diren txirrindulariei zuzendutako alerta-sistema bat eta kamioiei errepide bidezko ibilbidea planifikatzen lagunduko dien aplikazio bat garatuko dira. Pilotua Bilbon inplementatzen hasia da, eta horrexeri lotuta daude Bizkaiko hiriburuko udala, Gertek, Kapsch, MLC, Dachser, DGT, Donostiako Udala, Dbus eta CTVi.

C-Mobile proiektua Europar Batasunak kofinantzatu du eta 2020ko azaroan amaituko da. C-ITS zerbitzuek mugikortasunaren arloko erronkei aurre egiteko duten potentzialtasuna frogatzea da -bereziki, hiri-eremu konplexuetan- partzuergoaren helburua, aplikazio berriak garatuz eta beste hiri batzuei eraldaketa honekin bat egiteko aukera erraztuko dieten gidak sortuz.

Ceit

Irabazi-asmorik gabeko ikerkuntza zentroa da Ceit, 1982. urtean Nafarroako Unibertsitatearen ekimenez sortua. Ikerkuntza zentro honen egiteko nagusia, hain zuzen, ikerkuntza aplikatuan oinarritutako kontratu bidezko industria proiektuak gauzatzea da, enpresen I+G sailekin lankidetza estuan.

Ceit-ek ikerkuntza aplikatuetan bikaintasuna bultzatzen du, isilpekoak ez diren emaitzak argitaratuta, foro tekniko zein zientifikoetan parte hartuta eta industriaren alorreko ikerkuntza proiektuetan doktoretza prestakuntza eskainita.
Ceit-ek lankidetza egonkorra bilatzen du hainbat sektoretako enpresekin (burdinbideetakoa, aeronautika, automobilgintza, osasuna, ekoizpena, energia edo ingurumena), eta bere bezeroen negozioarekin zerikusia duten alderdi guztiak ulertzen ahalegintzen da; betiere, ikerkuntza aplikatuko proiektuen bitartez balio erantsi handiko irtenbideak sustatuta. Eta bezeroei irtenbide berritzaileak eskaintzeaz gainera, lan munduan txertatuko diren eta ekoizpen sistemari balioa gehituko dioten ikertzaile gazteak ere trebatzen ditu.

Zentroak, bestalde, ikerkuntzaren eta irakaskuntzaren arteko osagarritasunean oinarritutako eta kristau humanismoaren balioetan inspiratutako proiektu bat partekatzen du Nafarroako Unibertsitatearekin.

eWorld aldizkariko berria da