Duela hilabete jaio zen Aditu, bideoak eta audioak euskaraz eta gaztelaniaz transkribatzeko eta azpititulatzeko aukera ematen duen plataforma berria. Dagoeneko 500 erabiltzaile baino gehiago izan ditu denbora honetan tresna berriak. Aditu sortzeko, Elhuyarreko I+G taldeak adimen artifiziala eta hizkuntza-teknologia berritzaileenak erabili ditu, modu horretan orain arte hizkuntza jakin batzuetara mugatuta zegoen tresna euskarara zabaltzeko.

Audioak eta bideoak modu automatikoan transkribatzen eta azpititulatzen dituen plataforma da Aditu, bai zuzenean, bai aurrez grabatutako artxiboetan, euskaraz eta gaztelaniaz. Bere erabilerak askotarikoak izaten ari dira lehenengo hilabete honetan: aplikazio horrekin, elkarrizketen grabazioak transkribatzen dituzten kazetariak, entzumen-arazoak dituzten eta hitzaldi edo abesti bat azpititulatzen duten pertsonak, mugimendu-zailtasunak dituzten pertsonak, idazteko aukerarik ez dutenak eta abar. Badira, baita ere, kotxea gidatzen ari diren bitartean txosten baterako hausnarketak diktatzen egiten dituztenak, Adituk bien bitartean automatikoki transkribatu ditzan.

Elhuyarrek hainbat urtez lan egin du aplikazio horren atzean dauden sare neuronalak eraikitzeko, sare horiek beren ikaskuntza edo entrenamendu prozesua milaka daturen bidez egin dezaten, eta, azkenik, tresna hori erraz erabiltzeko aukera ematen duen interfazea sortzeko.

Baliabide digitalak euskara bezalako hizkuntzetara zabaltzea da tresna honekin duten helburua. Jon Abril Elhuyarreko zuzendari nagusiak nabarmendu duenez, “erraldoi teknologikoen estrategietatik eta merkatuen interesetatik kanpora daude” euskara bezalako hizkuntzei egokitzen diren tresna hauek. Orain, albisteen transkripzioa eta azpitituluak, dokumental baten edo udaletxe bateko bilkuren transkribapena hemen egin daitezke. Zerbitzua doakoa da proba-moduan.

Elhuyarreko hizketa-teknologien arduradun Igor Leturiak azaldu duenez, haiek duten erronka bikoitza da orain: alde batetik, hobekuntzak egitea, zarata duten audioekin, edo euskararen dialekto desberdinekin, adibidez. Bestetik, gogorarazi du “pertsonen eta makinen arteko elkarreragina gero eta handiagoa da, eta, kasu askotan, interakzio hori ahotsaren bidez egiten da, adibidez Sir edo Alexa laguntzaile birtualak edo ahots bidez zuzendutako 4.0 industriako makinak“. Horrek atea zabaltzen du Aditu produktu edo sistemetan integratzeko, hala nola domotikan, nahi den hizkuntza erabili ahal izateko, kasu honetan euskara edo gaztelania.

 Aditu

 
Zer eskaintzen dute? Puntako transkripzio-teknologia, bezeroen beharretara egokituta eta datuen konfidentzialtasuna errespetatuz.

• Puntako teknologia: Hizketaren ezagutzaren arloko teknologia berritzaileenak erabiltzen dituzte: adimen artifiziala, sare neuronalak...
• Konfidentzialtasuna: Erabiltzaileen datuak modu seguruan kudeatzen dituzte, konfidentzialtasuna bermatuz.
• Neurri-neurriko soluzioak: Zerbitzua bezeroen aplikazioetan integra daiteke API deien bidez, edo bezeroarenean ere instala dezakete.
• Hizketaren ezagutza elebiduna: Adituk euskara eta gaztelania ezagutzen ditu.
• -Audioak eta bideoak: Adituk honako hauekin funtzionatzen du: Audio-fitxategiak; Bideo-fitxategiak; Onlineko audio edo bideoetarako estekak (EITB, RTVE, Youtube, Facebook, Instagram...).