KABIA Eusko Jaurlaritzak bultzatutako ekimen berri bat da, eta HAZI erakundearen bidez aurkeztu da beren jarduera garatzen duten edo Euskadiko landa- eta itsasertzeko eremuetan negozio-proiektu berriak hasi nahi dituzten pertsona ekintzaileei laguntzeko, baita elikaduraren eta zuraren balio-katearekin zerikusia duten akelleei laguntzeko ere.

Gune berri honek topagune fisikoa eta digitala eskaintzen du, interes, erronka eta esperientziak partekatzen dituzten pertsonen, sektoreko eragileen eta ekintzailetza-proiektuei laguntzeko ekosistemako entitateen arteko harremana errazteko.

HAZI enpresa-proiektu berri bati ekiteko akonpainamendua eskatu duten pertsonen %80k bakarka egiten du. Negozio berri bat abian jartzea, beraz, ia beti bide bakartia da, eta ziurgabetasun eta zalantza askori egin behar zaie aurre, ez baitakigu nondik hasi edo ez baitago behar adinako gaitasunik.

Hori da, hain zuzen ere, 2015erako Ekintzailetzako Ostegunetako programa abian jartzeko arrazoietako bat. Topaketak presentzialak dira, eta pertsona ekintzaileen arteko harremana sustatzen dute esperientziak partekatzeko, aukerak detektatzeko edo proiektuak ideia berritzaileen bidez lantzeko. Hain zuzen ere, foro horretan sortu zen kultura ekintzailea sustatzeko eta ekimenak dituzten pertsonen arteko loturan aurrera egiteko beharra.

Behar horren irtenbidea KABIA da. Ekimen horrek aurreko guztiari espazio birtual bat gehitzen dio, topagune presentzialetan sortutako material guztia biltzen duena, eta foro gisa balioko duena komunitate ekintzaile guztia modu jarraituan antolatuta eta konektatuta egon dadin eta prestakuntza-ikastaroak, esperientzia inspiratzaileen adibideak, kontaktu-sarea, aholkularitza aditua eta abar izateko.

KABIAren izaera azaltzeko, hura osatzen duten pertsonen ordezkaritza batek plater gastronomiko bat prestatu du aurkezpenean, komunitatean ekintzailetzak dituen onurak eszenifikatzeko. Platerkada horretan, emaitza ezin hobea izateko osagaiak ongi lotutako pertsona ekintzaileak dira.

Ekintzailetzari laguntzeko erakundeetako hainbat eragile eta ordezkariez gain, Jone Fernández Landa Eusko Jaurlaritzako Landa eta Itsasertzaren Garapeneko eta Europako Politiketako zuzendaria ere izan da ekitaldian, eta oso positibotzat jo du KABIA abian jartzea: “Horrelako ekimenek lankidetzarako, elkarrizketarako, ideien trukerako, ikaskuntzarako eta berrikuntzarako erreferentzia-espazioak sortzeko beharrari erantzuten diote”.

Zuzendariak gaineratu duenez, “pertsona ekintzaile batek aurrean dituen arazo nagusiak zenbait gairi heltzeko egitura faltarekin lotuta daude. Horregatik, garrantzitsuak dira KABIA bezalako topaguneak, gainerakoekin elkarreragiteko borondate pertsonalaren eta ekosistema ekintzailea hobetzen eta indartzen aktiboki laguntzeko asmoaren bidez sortuak”.