Bosgarren urtez jarraian, MONDRAGON Sustapen Zentroak, negozio berriak eta ekintzailetasuna sustatzeko plataforma korporatiboak, irailaren 5etik 7ra Salamancan antolatutako nazioarteko ekitaldiaren 8. edizioan parte hartu zuen Key Player eta Partner moduan.

Estatu-mailan alor horretako hiru ekitaldi onenen artean kokatzen da, eta azken urteotan Hego Amerikako herrialdeetako ekosisteman ere nabarmendu da, bertako bost herrialdetan urteroko bisitak eginez. Aurtengo edizioan, gainera, Mondragon Unibertsitatea ere bertan izan zen, bertako ekintzailetasunaren alorreko unitatea den Mondragon Team Academy-ren eskutik. Horren barne kokatzen da LEINN gradua, eta berau ordezkatuz hainbat ekimen aurkeztu dituzte ondorengo startup-ek: Smallops, Vidext eta The Good Goal, Bibagu eta La Rioja proiektuekin batera. Leinner parte-hartzaileekin batera, unibertsitateak bere stand-ean aurkeztu ditu bai aipatutako proiektuak baita ekintzailetasun-sarean dauzkan beste hainbat ere. MTAko kideak gustura geratu dira ekitaldiak emandakoarekin.

Sektore anitzetako 170 startup baino gehiago, 100 inbertitzaile eta Korporaziotik gora, 2.500 bisitari, 80 mahai-inguru eta 1.100 bilera baino gehiagorekin, Startup Olé ekitaldi garrantzitsua bilakatu da MONDRAGONentzat, hain zuzen, Korporazio ekintzaile bezela lortu nahi duen posizionamenduari begira. Izan ere, Startup Olé puntako ekitaldia bilakatu da hainbat esparrutan, oinarri teknologikoa duten proiektu berritzaileak batuz, kalitatezko konexioak ahalbidetuz eta tendentzia teknologikoak ezagutaraziz. Azken batean, testuinguru aparta bilakatzen da MONDRAGON Sustapen Zentroak taldeko kooperatiben interesekin bat egin dezaketen proiektuen eta inbertsioen identifikazioaren sustapenean lanean jarrai dezan.

Berrikuntza irekia

Ildo honetatik, 100 startup baino gehiagoren finantziazio eta elkarlan beharren inguruko aurkezpenetan parte hartu dugu, baita 30 batekin bildu ere. Aldi berean, Joseba Sagastigordiak, MONDRAGON Sustapen Zentroko zuzendariak, 'Oportunidades para la Innovación Abierta en Empresas y Corporaciones' izenburupean antolatutako mahai-inguruan parte hartu du. Mahaikide izan ditu beste Korporazio batzuetako ordezkariak, hala nola, Renfe, Once Fundazioa, Cinfa, Acciona eta RTVE Korporazioa (Innova proiektua). Bertan, berrikuntza irekiaren alorreko esperientziak partekatu dituzte, startup-ekin eraiki daitekeen harremanaren egituraketan inbertsio korporatiboa balioan jarriz.

Mondragon Team Academy

Mondragon Team Academy (MTA), nazioarteko komunitatea da, eta bertan, 2.500 ekintzailek baino gehiagok parte hartzen dugu, gizarte-berrikuntzarako laborategien sare globala sortuz.

Zer egiten dute?

• Ekintzaileen komunitateak: Laborategiak ekosistema kolaboratiboak dira. Bertan, profesional, talde-ekintzaile, enpresa eta startupen arteko lankidetza sustatzen da gizartera inpaktu positiboa ekarriko duten proposamenak garatzeko. Egunerokoan aurkitzen digutun oztopoak elkarbanatzeko eta gainditzeko espazioak dira ere.
• Learning for tomorrow: Bere programek orain arte ezagutu den guztiarekin apurtzen dute, "egiten eta sortzen ikasi" printzipioa jarraitzen baitugu MTAn. Pertsona ausartak prestatzeko pentsatuta daude, orainean eta geroan ditugun erronkei taldean aurre egiteko gai izango direnak.
• Errealitate bihurtutako ideiak: MTAn, talde-ekintzaileak babesten eta estimulatzen dituzte, beren proiektuak enpresa-errealitate bihur ditzaten.
• Elkarrengandik urbilago: Enpresekin eta erakundeekin elkarlanean aritzen dira, aurrean dituzten erronkei ikerketa, berrikuntza eta eraldaketa proiektuen bidez erantzuteko.

Bere helburua, inpaktu lokal eta global bat izan nahi duten talde ekintzaileen komunitate bat sortzea da, elkarrekin eragin erradikala eta positiboa sortzeko.