Gandiaga Topaguneko Oteiza aretoan, Arantzazun, egin zen K-Foroaren, MONDRAGONeko Komunikazio Foroaren, edizio berria. Bertan, Korporazioko kooperatibetako komunikazio eta marketineko ehun bat profesional elkartu ziren.

Aurkezpen, eztabaida eta iruzkin zein ekarpen interesgarrien artean igaro zen goiza Arantzazun: marka, komunikazio-estrategia, komunikabideekiko harremana, marketina eta adimen artifizial sortzaileaz izan zituzten hizpide. Javier Marcos MONDRAGONeko Komunikazio zuzendariak gidatu zuen topaketa.

Iñigo Ucin MONDRAGONeko lehendakaria izan zen hitza hartzen lehena, eta ongietorria egin zien Arantzazura hurbildu ziren pertsonei. Ondoren, hitza hartu zuen.

Leire Mugerzak, Korporazioko Batzorde Iraunkorreko presidenteak, MONDRAGONek bere lekua hartu eta iritzia eman behar duela adierazi zuen. "Gizarteak esaten duena eragina du norberaren markan", ziurtatu zuen.
Bere hitzaldian, Mugerzak komunikazioaren kudeaketa proaktiboago baten aldeko apustua egin zuen. "Barrualdera eta kanpoaldera proiekzio handiagoa izan behar dugu. Gure kolektiboarekin eta kanpoko publikoarekin konektatzeko, bestela beste batzuek hartuko dute gure espazioa. Denek hitz egiten dute helburuaz eta guk ez dugu egiten, MONDRAGONen asmoa fundaziozkoa denean".

Leire Mugerzak Taldeko kooperatibetako Komunikazio eta Marketin sailetan lan egiten duten profesionalen lana goraipatu zuen. "Gure erakundeetako komunikazio-profesionalak oso garrantzitsuak zarete. Baina guztion lana da komunikazioa lantzea. Balio diferentziala transmititu egin behar dugu, eta guztion esku dago. Komunikazio-estrategia oso garrantzitsua izango da datozen urteetan".

Komunikazioaren balio estrategikoa

José Manuel Velascok, liderren prestatzaile eta coach-ak eta komunikazio estrategikoan adituak, komunikazioaren balio estrategikoari buruzko hitzaldi bat eskaini zuen. Dekalogo bat aurkeztu zuen eta bertan zeudenei hamar gako eskaini zizkien etorkizunean komunikazioa kudeatzeko. "Mesfidantzazko ingurune batean bizi gara, eta komunikazioa konplexuagoa eta sofistikatuagoa da", esan zuen. Zarataren aurrean, "konfiantza sortzea funtsezkoa da, eta are gehiago enpresa munduan", ziurtatu zuen Velascok. "Gaitasuna, sinesgarritasuna eta prestatutako bozeramaileak dira komunikazio on baterako antidotoa".

Adimen artifizial sortzailea

Azkenik, Mondragon Unibertsitateko Eli Garciak Adimen Artifizialeko hainbat tresna erakutsi zituen modu oso praktikoan, etorkizunean kazetarien, marketineko zuzendarien eta enpresetako komunikazioko zuzendarien lana erraztuko dutenak. ChatGPTren bertsio irekia, eta ChatGPT4 erakutsi zituen. "2023ra arte adimen artifiziala ia ez zegoen komunikazioaren eta markertinaren esparruan. Orain haien presentzia kudeatu behar dugu, eta gure kopilotua balitz bezala egin behar dugu". 

Garciak ziurtatu zuen AA sortzaileak testuak, irudiak, bideoak, azpitituluak sortzen lagun dezakeela, baita benetako ahotsekin bideoak bikoizten ere. Haren mezua argia izan zen. "AAri egindako galderetan asmatu behar dugu, emaitza ahalik eta naturalena eta fidagarriena izan dadin. Eta hori entrenamenduarekin egiten da. Pixkanaka denok egin behar dugu. Ikasi egin behar dugu. Huts egiteko beldurrik gabe. AAk eskaintzen dizkigun aukera guztiak ezagutzea eta erabiltzea ezinbestekoa da guretzat".

Ikus-entzunezko Ekintzailetzako eta Berrikuntzako aditu-ikastaroa

Bestetik, Mondragon Unibertsitateak Ikus-entzunezko Ekintzailetzako eta Berrikuntzako aditu-ikastaroa abiatu du bigarrenez. Interesa dutenek urtarrilean hasi eta ekainean amaituko den titulu hori egiteko aukera izango dute. Mondragon Unibertsitatearen Humanitate eta Hezkuntza Zientzien Fakultateak eskaintzen duen ikastaroak Nafarroako Gobernuaren Industriako eta Trantsizio Ekologiko eta Digitalerako Departamentuaren laguntza du eta erdi-presentziala izango da. Egoitza presentziala Lekarozko Enpresa Campusean egongo da.

Tituluan ikus-entzunezkoen alorreko edukiak jorratuko dira, sektorearen egoera ezagutzeko eta egungo merkatuaren joerak identifikatzeko; horrez gain, ekintzailetzako eta berrikuntzako estrategietan sakonduko da. Horrela, ikuspegi dibergente baina, aldi berean, integraletatik erantzun ahal izango diete sektoreak dakartzan erronkei.

Sektorea bultzatu

Prestakuntza-programa hori Nafarroako Gobernuaren Enpresa Politikako, Nazioarteko Proiekzioko eta Laneko Zuzendaritza Nagusiak bultzatu zuen, Nafarroako Garapen Ekonomikoko Departamentuaren estrategiaren, S4 delakoaren, ekintzen artean. Estrategia horrek ikus-entzunezkoen sektorea bultzatzen du, baita beste industria-sektore batzuk ere, eta, bigarren emanaldi honetan, NAPAR - Nafarroako Ekoizleen Elkartearen laguntza ere izango du.

Nafarroako ikus-entzunezkoen sektoreari ezagutza bereizgarria eta espezializatua emateko beharraren ondorioz sortu da titulua, eta helburu argia du: foru-erkidegoko ikus-entzunezkoetako enpresa-sarea sendotzea, negozio-eredu berrien bidez. 

Aspaldi honetan, ikus-entzunezkoen sektorea garrantzi eta proiekzio handia ari da hartzen foru-erkidegoan. Horren erakusgarri da Nafarroako Gobernuak arlo hori sustatzeko egindako apustua. Izan ere, Nafarroako Gobernuaren Industriako eta Trantsizio Ekologiko eta Digitalerako Departamentuaren laguntza jasotzen du sektoreak. Hori dela eta, prestakuntza sustatzeko, matrikulen prezioaren % 55eko hobaria eman du berriro ikastaroaren bigarren edizio honetan.