Bi erakundeek jardunaldi bat antolatu dute, VIVID MTA inkubagailuaren bigarren edizioan parte hartuko duen taldea hautatzeko. Jardunaldian VIVID inkubagailuaren emaitzak ezagutarazi dituzte. Proiektuaren asmo nagusia da landa-udalerriei gazte talentudun kualifikatuak erakartzen laguntzea.

Mondragon Team Academyk eta Emplea Fundazioak abiatutako egitasmoarekin unibertsitate gehiagok egin dute bat; hala nola Nafarroako Unibertsitateak, Nafarroako Unibertsitate Publikoak, Zaragozako Unibertsitateak eta UPV-EHUk.

Parte hartuko duten gazteak hautatzeko, lehiaketa egin da, LEINN graduko hautagaiek erronka honi erantzungo dion proposamen bat presta dezaten: "Imajinatu 500 biztanleko herri bat zaretela. Zer ekimen jarriko zenituzkete martxan gazte talentudunak zuen udalerrira erakartzeko eta bertan geratzea ahalbidetzeko?".

Gazte parte-hartzaileek iragan ostiralean elkartu ziren Enpresagintza Fakultatearen Oñatiko campusean. Jardunaldian, bi mahai-inguru egin ziren, helburu desberdinekin: mahai-inguru batean, Mondragon Unibertsitateko, Nafarroako Unibertsitateko eta Valladolideko Unibertsitateko zenbait irakaslek agerian utzi nahi izan zuten nola lor dezaketen prestakuntza-zentroek (beste eragile batzuekin batera) lurraldeen eraldaketan eta dinamizazioan aitzindari izatea. Kasu horretan, landa-garapenerako baliabide estrategiko bihurtzea da modua.

Bigarren mahai-inguruan, 2022an herri horretan zenbait hilabetez bizi izan diren ikasleek bi esperientziaren berri eman dute. Despopulazioaren arrazoiak ezagutzea eta horren aurkako irtenbideak ematea izan da egonaldiaren xedea. Hainbat unibertsitatetako ikasleek lurraldean eragina izan duten proiektuak garatu dituzte, zenbait formatutan (gradu-amaierako proiektuaren eta praktiken bidez, besteak beste).

Lehenengo esperientzian (gradu-amaierako lanaren formatua), ekintzailetzari laguntzeko zerbitzu-eredu baten kontzeptua diseinatu da, landa-inguruneko gazteei zuzenduta eta Espacio Alpha proiektuaren aurretiko esperientzia oinarri hartuta, eta VIVID Akademia prestakuntza-programaren jarraipenarekin. Izan ere, programa hori kontzeptualizatzen ari da ekintzailetzaren jarraipena eta laguntza.

Birpopulatze-turismoaren esparrua

Birpopulatze-turismoaren esparruan garatu den mahai-inguruan aurkeztu da bigarren esperientzia. Xede horrekin, ikasleetako batek azaldu du nola burutu zuten murgiltze-prozesu bat lurraldean, nola izan ziren herritarrekin harremanetan eta nola egin zieten aurre herritar horien erronkei. Ekitaldiaren bigarren zatian, lehiaketa egin da. Bertan, proposatutako erronkari erantzuteko irtenbideak eman dituzte Mondragon Unibertsitateko Lidergo Ekintzailea eta Berrikuntza graduko ikasle gazteen bost taldek, eta horietako batek irabazi du.

Azkenik networking edo sarean lan egiteko espazio bat partekatu dute bertaratuek, hots, landa-eremuak eta, zehazki, VIVID inkubagailuak eskain ditzakeen aukerak ezagutzeko irrikan zeuden beste gradu edo maila batzuetako ikasleek.

Plataforma digitaleko kooperatibak

Bestetik, Mondragon Team Academyk, Mondragon Unibertsitatearen Enpresagintza Fakultateko ekintzailetza-unitateak (MTA-MUk), 'Platform Coop Venture Builder' plataforma digitala sortu du, kooperatiben ekintzailetzako ekosistema sustatzeko, plataforma digitaleko kooperatibak ikertzeko, sustatzeko eta bizkortzeko nazioko sarearen bidez. Proiektua EAEn, Katalunian, Valentziako Erkidegoan eta Andaluzian gauzatuko da, ekintzailetza kolektiboa sustatzen duten erakunde eta entitateen eskutik. 

Plataforma-kooperatibak hazten ari den fenomenoa dira, eta jabetza pribatuko plataforma digital handien aukera. Kooperatiba-mota horiek eredu dira, Estatuko kooperatiba tradizionalen historia luzea eta askotariko ikaskuntzak eta lan digitaleko plataformek gaur egun eskaintzen dituzten aukerak bateratzen baitituzte, lan duina eta arduratsua eskainiz. Mugimendu kooperatiboa indartzeko aukera ere bada, digitalizazioak eta plataforma digitalen ereduek hazteko eta eskalatzeko ahalmen handia baitute.

Espainian plataforma-kooperatiben hazi bat badago ere, oraindik beharrezkoa da artikulazio handiagoa, sareko lana eta lan koordinatua bultzatzea, mugimendua indartzeko. Ikuspegi horretatik sortu da "Platform Coop Venture Builder: ekintzailetza kooperatiboko ekosistema dinamizatzea, plataforma-kooperatiben zabalkundearen, ikerkuntzaren eta inkubazioaren bidez" proiektua. Gizarte Ekonomia Bultzatzeko Plan Integralaren laguntza-deialdiaren bidez jaso du finantzaketa, 2022ko eta 2023ko sare ekonomiko, inklusibo eta jasangarria sortzeko xedez, Espainiako Laneko eta Gizarte Ekonomiako Ministerioak Europar Batasuneko Next Generation Funtsekin gauzatutako Berreskuratze, Eraldaketa eta Erresilientzia Planaren esparruan.

'Platform Coop Venture Builder' proiektuak ekintzailetza kooperatiboko ekosistema eta plataforma digitaleko kooperatibak ikertzeko, sustatzeko eta bizkortzeko nazioko sarea dinamizatzea du helburu, eta, horrela, epe ertain eta luzera, kooperatiben berroneratzea eta ekonomia digitalari eta plataforma kooperatiboei loturiko enpleguaren sorrera sustatzea.

Zer dira venture builderrak?

Proiektuak venture builder kooperatibo bat sortzea du helburu, garatzeko bidean diren enpresen faktoria antzeko bat. Beste herrialde edo merkatu batzuetan funtzionatu duten negozio-ideiak edo -ereduak egokitzen ditu, ondoren tokiko merkatuan aplikatzeko eta start-up berriak martxan jartzeko. Xedea, beraz, ez da proiektu propioak babestea soilik, baita lehendik dauden eta plataforma digitalen kooperatiben eremuan izaera kooperatiboko eta sozialeko ekarpena egiteko ahalmena duten proiektuak inkubatu eta bizkortzea ere. Negozio-eredu horrek balio bereizgarriak ditu jabetza partekatuari dagokionez. Baterako sorkuntzako eta baterako partaidetzako prozesu bat da, pertsonengan eta guztien ongian gehiago ardaztua, botere-iturri diren teknologian edo kapitalean baino.