Enplegua sustatzeko GazteOn programak gizartetik baztertuta geratzeko arriskuan dauden 300 gazte baino gehiago laneratzea lortu du.

Enplegu- eta prestakuntza-programa mistoaren bosgarren edizioa industria eta eraikuntza jasangarriko ibilbideak indartuz eta parte-hartzaileen kopurua 350era igoz hasi da (aurreko urteetan 120 izan ziren). Lehen aldiz programa Bizkaiko Foru Aldundiaren Umeen Zerbitzuak hartutako gazte adingabeei ireki zaie. Mikel Torres lehendakariordeak eta Teresa Laespada ahaldun nagusiordeak Peñaskal Kooperatiba prestakuntza-zentroa bisitatu dute. Mikel Torresek nabarmendu du 2022-2024 gazteen enplegu-programaren bidez ia 105.000 gaztek parte hartuko dutela Eusko Jaurlaritzaren programetan.

Laespada: "Lan egin nahi dute eta bakarrik aukera bat behar dute"

Bizkaiko Foru Aldundiak sustatzen duen GazteOn enplegu- eta prestakuntza-programa mistoak 2020an abian jarri zenetik gaur egunera arte gizarte-bazterketa jasateko arriskuan dauden gutxienez 309 gazte laneratzea lortu du; horrek esan nahi du parte-hartzaile guztien % 60 baino gehiago direla.

Mikel Torres lehendakariordeak eta Teresa Laespada ahaldun nagusiordeak Peñaskal Kooperatibaren instalazioak bisitatu zituzten irailaren 13an, GazteOn programari lotutako prestakuntzan laguntzen duen zentroetako bat. Programan aurten 350 parte-hartzaile izan dira, aurreko edizioetan 120 izan zirenean.

Programak bosgarren edizioa du aurtengoa, eta aurten lehen aldiz programaren onuradun izan daitezkeenen artean daude gaur egun Bizkaiko Foru Aldundiaren Umeen Zerbitzuaren harrerapean dauden adingabeko gazteak (16-18 urte) ere.

Parte-hartzeari eta laneratzeari buruzko datuei dagokienez (iazko edizioko zifrak ez dira behin betikoak), esan daiteke hasieratik programak 501 parte-hartzaile eta 309 laneratze (% 61,67) izan dituela. Lan egin den sektoreen artean industria (elikagaien arloa, itsasontzigintza, mantentze-lanak edo gainazalen tratamenduak), zurgintza, sukaldaritza, elektrizitatea, etxebizitza, eraikuntza jasangarria edo arrantza daude.

GazteOn programak Bizkaiko herritar guztien garapen ekonomikoa eta oparotasuna bultzatzen ditu. Lehenengo urtean bakarrik inbertsioaren (programa eta gazteentzako laguntzak) eta etekinen (gazteentzako laguntzetan aurreztea, eta gazte horiek sortutako kontsumoak, erosketak, kotizazioak eta zergak) arteko aldea 365.000 eurotik gorakoa izan zen.

Laespada, aldi berean, Enplegua, Gizarte Kohesioa eta Berdintasuna Sustatzeko Saileko arduraduna ere bada, eta bisitan adierazi zuenez, lan egin nahi duten gazteak dira, eta horretarako aukera baten zain baino ez daude.