Euskadiko industria berritzaileenaren ordezkaritza handia bildu zen azaroaren 13 eta 14an Basque Open Industryn. ETEaren Europako Asteak nazioarteko hainbat egitasmo eraman zituen Bilbao Exhibition Centerrera (BEC), eta horietako bat zen Euskadiko industriaren ahalmena erakusteko baliagarria izan zen hitzordu hori. 

Basque Open Industryren eskaintza zabala izan zen eta Euskadiko ekosistema industrial eta teknologiko zabala erakusteko balio izan zuen. 'Let's meet in Innovation Land' lelopean, bi jardunalditan pandemiara arte egin ohi zen Basque Industry 4.0ren lekukotza jaso zen. Eragile publiko, pribatu eta enpresa ugari izan ziren bertan. 

Eskaintza zabala eta askotarikoa

Baina BOI ez zen soilik baliagarria izan Europako erakundeetako ordezkarien aurrean Euskadiko industriaren ahalmena erakusteko. Izan ere, ETEei honako aukera hauek ere eskaini zizkien: industriaren sektoreari zuzendutako laguntzak ezagutzea, teknologiak probatzea eta balioztatzea, nazioartekotze-prozesurako laguntzak ezagutzea eta, oro har, era askotako gaien inguruko joeren berri izatea (talentuarekin lotutakotik hasi eta trantsizio digitalera, energetikora eta ingurumen-mailakora iristeraino). Horretarako, BOIren programak 150 protagonista bildu zituen (espezialistek eskainitako hitzaldiak eta ehun bat erakusketari barne). Gainera, enpresen arteko topaketak antolatu ziren haien arteko interkonexioa bultzatzeko.

Talentua Erakartzen eta Adimen Artifizialean adituak

BOIn aditu gehiago ere izan ziren. Hala, mahai-inguruetan eta solasaldietan, gai hauen inguruko azken joerei buruzko informazioa eman zuten: Talentua, Adimen Artifiziala, Zibersegurtasun Industriala, Trantsizio Digitala eta Trantsizio Energetikoa eta Ingurumenekoa.

Talentuarekin lotuta, honako hauek izan ziren bertan: José María Peiró, Universitat de Valénciako Erakundeetako Psikologia Sozialaren Unibertsitateko katedraduna eta Daniel Mikolta, Pertsonen zuzendaria Ingeteam enpresan.
Adimen Artifizialarekin lotuta, Petra Püchner-ek, Württembergeko Ekonomia, Lan eta Turismo Ministerioaren Europako komisarioak eta Steinbeis Europa Zentrumeko zuzendariak, AAren bidez negozio-eredu berriak gaitzen dituzten Europako ekimen berriak azaldu zituen.

Erakusketariekin biltzeko hitzorduak APP Networking Landen

Enpresa parte-hartzaileen artean sortu ohi den interkonexioa da enpresek gehien baloratzen duten eta garrantzi handia duen zatietako bat. Horretarako, APP (Networking Land izenekoa) bat gaitu zen. Horren bidez, trukea erraztu ahal izan zen eta Euskadiko ETE-ek erakusketariengana sarbide erraza izan zuten eta aurrez hitzorduak adostu ahal izan zituzten zibersegurtasun arloko enpresekin, startupekin eta BIND 4.0 programako enpresa bultzatzaileekin, Basque Research & Technology Allianceko (BRTA) teknologia-zentroekin eta abarrekin.

Joeren zuzeneko behatokia

BOI manufaktura aurreratuaren eta Euskadiko industria adimendunaren aplikazio berrien azken joerak zuzenean ikusteko behatoki moduko bat izan zen. Euskadik azeleragailua zapaldu du berrikuntzan, eta, izatez, 21 postu egin du gora Europako rankingean.

Programaren barruan konferentziak, mahai-inguruak eta tailer praktikoak zeuden, elkarri lotuta zeuden hiru blokeren egiturarekin; batetik, talentua; bestetik, industria adimendunerako joerak eta; horrez gain, trantsizio energetiko-ingurumenekoak eta teknologiko-digitala.

Gai jakinen inguruan sakontzeko aukera izan zen bertan: nazioartekotzea, ekintzailetza, zibersegurtasuna edo teknologia, adibidez.

Nazioartekotze irisgarria eta Ukrainako standa

Nazioartekotzeari dagokionez, nazioarteko hedapena azkartu nahi duten Euskadiko ETE-ek SPRI Taldearen Kanpoko Sarea izan zuten eskura, informazioa eskainiko zuten stand propioekin. Hala, SPRI Taldeko Kanpoko Sareko 18 bulego egon ziren ordezkatuta, Euskadiko Nazioartekotze Agentziak, Basque Trade & Investmentek (BTI), koordinatuta. Agentziak 90 herrialdetara iristeko ahalmena du.

Standetako batek, gainera, esanahi berezia zuen. Ukraina izan zen haren oinarria eta 'Rebuild Ukraine' izena izan zuen. Varsoviako bulegoko kideek (bulego hori arduratzen da Ukrainako merkatuaz), eta Ukrainako enpresek eta elkarteek herrialdea berreraikitzeko programan parte hartzeko aukera eskaini zien Euskadiko enpresei (programa Europar Batasunak babestu du).

BIND 4.0ri lotutako punta-puntako startupak

Ekintzailetzak ere garrantzi handia izan zuen ekimenean eta BIND 4.0 programari lotutako Euskadiko punta-puntako startupei eskainitako standak izan ziren. Programa horrek ia 200 proiektu bizkortu ditu sektore industrial askotako eta neurri desberdinetako Euskadiko beste enpresa batzuekin eratutako loturari esker.

Sustatzaileekin harremanetan jartzeko aukera izan zen, industria-sektorerako planteatzen dituzten eta Euskadiko enpresa-ehunduran txertatu daitezkeen irtenbideak ezagutzeko. Halaber, lankidetzarako bideak zabaltzeko lotura-puntua aurkitu dezaketen lehiakideen arteko harremana ere sustatu zen. Astelehenean, hilaren 13an, programako arrakasta-kasuetako batzuk gertu-gertutik ezagutzeko aukera egon zen.