DIGILAB, zibersegurtasun industrialeko lehen laborategia

DIGILAB izango da, halaber, ENACek UNE 17025 arauarekin bat akreditatutako Espainiako zibersegurtasun industrialeko lehen laborategia. Bertan, produktu elektronikoaren adostasuna ebaluatzeko saiakuntzak egin ahalko dira, IEC 62443 arau berriaren arabera. IKERLANek Europako eta Ameriketako erakunde nagusiekin (ISA SECURE, adibidez) erregistratutako eta egiaztatutako metodologia du.

“IKERLANen historiako jauzi teknologiko berri bat da, etorkizuneko I+Gko espezializazioaren aldeko apustu estrategikoa egiten duena, eta zentroa teknologia-eremu digitalaren erreferente gisa kokatzen duena. Etxeko marka gisa, teknologia merkatura hurbiltzeko eta enpresa bezeroak lehiakorragoak izateko beste urrats garrantzitsu bat da. Lankidetza publiko eta pribatuaren adibide berri bat da”, esan zuen Iñigo Ucínek, MONDRAGON Korporazioko lehendakariak.

Arantxa Tapiak, bere aldetik, IKERLAN zoriondu zuen azpiegitura berri honengatik, eta I+Gak euskal enpresa-sare eta ekonomia osorako duen garrantzia azpimarratu nahi izan zuen. “Erakundeok uste dugu gure ekonomiaren lehiakortasuna zentro teknologikoek egiten duten lanean datzala hein handi batean. Ondoren enpresari transmititzen zaion ikerketa eta garapena. AZPITEK programaren aurrekontua 5 milioi eurotik 12 milioi eurora handitu dugu, eta, egiaztatu ahal izan dugunez, tresna bikaina da aurrera egiteko”.

Markel Olano Gipuzkoako diputatu nagusiak adierazi zuenez, trantsizio teknologiko-digitalak “desafio handiak ekarri dizkio lurraldeko industriari, baina baita aukera eta leiho berriak ere”. “Erronka horiei guztiei aurre egiteko garaian, ahalmen garrantzitsuak dauzka gure lurraldeak. Zientzia- eta berrikuntza- sare indartsu bati esker, eraldatze digitalari sendotasunez eta izaera berritzaile batekin erantzuteko apustu garrantzitsuak egiten ari gara eta, ahalegin horretan, aitzindari izango dira Ikerlanen Arrasate Digilaben instalazioak”, azpimarratu zuen diputatu nagusiak, eta, era berean, erronka digitalari erantzuteko “enpresekin eta zentro teknologikoekin lankidetza estuan” jarraitzeko konpromisoa hartu zuen.